Главная » 2017 » Сентябрь » 29 » 1 Нөөрүктээйи сонуннара

1 Нөөрүктээйи сонуннара

2017-09-29 в 9:57 AM просмотров: 95 комментариев: 0 Новости Олекмы

Күһүн барахсан дьонун-сэргэтин күндүлээри көмүс мичээринэн эҕэрдэлии күлэн ас арааһын тардан кэбиспитэ эриэккэһин баҕаһын!
Нэһилиэгим дьоно кэлэн иһэр кыстыгы хайдах бэлэмнээх көрсөн эрэллэрин  бил-сээри кыладабыайдарын "кылатан" көрө, ээр-сэмээр кэпсэтэ сырыппытым маннык буолла.
Бастатан туран, хортуоппуй үүннэрээччи бааһынайдар баайдарын бар-бааччы этэр буоллахха, Ушницкай Альберт Михайлович 5 га сиртэн 33 туоннаны ылбыт уонна 25   т.   судаарыстыбаҕа туттарар былааннаах эбит. Хортуоппуйа былырыҥҥытааҕар ас көбө эбит.
Иккиһинэн, Сонтоев Степан Альбертович, Куду-Бэскэ бааһыналаах, өрүс уҥуор    буолан хортуоппуйун таһыыта түбүктээх буолла. Кини 3 га сиргэ олордон баран 32 туоннаны ылла. Онтон 15 туоннатын туттарар.
Үсүһүнэн, Борисов Сергей Николаевич эмиэ 3 га сиргэ хортуоппуй олордон 24 туоннаны хомуйда. Онтуттан 10 туоннатын туттарар буолбут.
Төрдүс бааһынай Филиппов Алексей Иосифович 10 га сиртэн 92 туонна үүнүүнү ылан дуоһуйбут эбит буоллаҕына,  онтуттан 62      туоннатын тутарар.
Онон бары холбоон 112 туонна хортуоппуйу туттараллар эбит.
Олохтоох дьаһалта инвентаризациятын сыыппаратынан биһиги нэһилиэкпитигэр 245  хаһаайыстыба баар. Балар 83,315 кв. м. сиргэ араас оҕуруот аһын - хортуоппуйтан саҕалаан дьэдьэнигэр тиийэ олордубуттар. Бары үчүгэй үүнүүнү ылбыттара астыннарар. Манна айылҕа бэлэҕин - отон арааһын, тэллэйи, отонноох мастар - харас, долохуна, дөлүһүөн, сарбынньах астарын хомуйбуттарын эбэн кэбиһиэххэ сөп.
Хаһаайыстыбалар кыбыы-ларыгар кырыы-кырыыты-нан кэбиһиилээх оттор лөглөһөллөр. Кыһын сиир оппутун хааччынныбыт, дэ-һэллэр дьонум-сэргэм.
Аны туран, дьаһаллаах өттүлэрэ (маннык дьон элбэхтэр) дьиэлэригэр электрическэй ситиминэн   ититиини (конвекторнай) киллэрэн эрэллэр.  Бу ордук кырдьаҕас дьоҥҥо уонна үксүн кэлэр-барар түбүктээх үлэлээхтэргэ табыгастаах.
Нэһилиэккэ биир сыл иһинэн-таһынан икки этээстээх таас культура дьиэтэ, эдэр специалистарга 4 квартиралаах олорор дьиэ, итиэннэ сайыҥҥы уу ситимин (водопровод) саҥардан оҥоһуллара күүтүллэр. 
Ону таһынан нэһилиэккэ кыраайы үөрэтэр түмэл (музей) аһыллыаҕа. Инникитин да нэһилиэк сайдыытын былаана элбэх, ол курдук, соҕотох дьоҥҥо эмиэ 4 квартиралаах олорор дьиэ тутуллара уо.д. а. тэрээһин былааннанар.
Бу этиллэр былааннар туо-лар кыахтаахтара нэһилиэк дьоно түмсүүлээх, көхтөөх буолалларыттан улахан тутулуктаах. Салайар аппараат үлэһиттэриттэн, депутаттартан ирдэбил күүстээх буолара эрэйиллэр. 
Билиҥҥи туругунан, орто оскуолабыт 130 сылын бэлиэтииргэ күүстээх бэлэмнэнии бара турар.

Александр БИРИ.
1 Нөөрүктээйи с.

Хаартыскаларга:  
С.Н.Борисов  бааһынатыгар хортуоппуй өлгөмнүк үүммүт;  
С.А.Иванов уһаайбатыгар кыстык ото; 
А.И.Филиппов хаһаайыс-тыбатыгар атыыга барар хортуоппуйу талаллар.

А.Филиппов түһэриитэ.

Фотографии по теме
Комментарии 0
Добавлять комментарии могут только зарегистрированные пользователи.
[ Регистрация | Вход ]
Copyright © 2014 АУ Редакция газеты «Олекма» Хостинг от uCoz Design created by ATHEMES