Главная » 2020 » Декабрь » 4 » Ийэ олоҥхоһут Афанасий Егорович Соловьев Тумэл дьиэтэ

Ийэ олоҥхоһут Афанасий Егорович Соловьев Тумэл дьиэтэ

2020-12-04 в 9:48 AM просмотров: 191 комментариев: 0 Новости Олекмы

Ийэ олоҥхоһут Афанасий Егорович Соловьев төрөөбүтэ 85 сылыгар анаан оҕолоро Анатолий Афанасьевич уонна Галина Михайловна Соловьевтар Бастакы Нөрүктээйигэ  музей дьиэтин тэрийэн оҥорон бэлэмнээбиттэр. Музей олоҥхоһут тиһэх сылларыгар олорбут дьиэтигэр оҥоһуллубут. Бу сыл муус устар 5 күнүгэр А.Е. Соловьев төрөөбүт күнүгэр аһыллыыта буоларын пандемия мэһэйдээбитэ. 
Музей уурбут туппут курдук оҥоһуллубута кэрэхсэтэр. Ол курдук олоҕун араас кэрдьиистэринэн, айбыт-туппут үлэлэринэн, республикатааҕы, россиятааҕы уонна Аан Дойдутааҕы тэрээһиннэргэ кыттыбыт сырыыларынан наарданан, олус өйдөтүмтүө гынан тыырыллыбыт. Олоҥхоһут үйэтин тухары илииннэн бэйэтэ суруйбут үлэлэрэ уонна төрүөҕүттэн ыла саҕалаан бэйэтин туоһу докумуоннара баара ордук киһи болҕомтотун тардаллар. Ол курдук төрөөбүт миитэрэккэтэ, оскуолаҕа үөрэнэ сылдьыбыт үөрэҕин таабыллара, комсомооллуу сылдьыбыт билиэтэ у.д.а. Отто илиитинэн суруйбут ахтыылара, айбыт үлэлэрэ, олоҥхолоро биллэн туран бу музей дьиэ сүрүн киэргэлэ уонна баайа буолаллара биллэр. Сэдэх хаартыскалара стендаларга түмүллүбүттэрэ эмиэ олус интириэһинэйдэр. Олоҥхолууругар кэппит таҥастара эмиэ музейы тупсараллар. Маны таһынан Афанасий Егорович бэйэтэ муспут библиотеката  сиэдэрэйинэн баайынан сөхтөрөр. Манна сэдэх саха литературата үгүһэ киһи болҕомтотун олус диэн тардар. Оҕолорго анаан кылаас чаастары оҥорорго табыгастаах дьиэ буолбут дьиэн бэлиэтиибин. А.Е.Соловьев олорорун тухары саха культуратын баайын дьоҥҥо-сэргэҕэ, кэнэҕэски ыччакка тиэрдэр сүдү баҕа санаалаах этэ. Ол санаатын оҕолоро ситэрэн, толорон муспут архыыбын сааһылаан, таҥан оҥорбуттара улахан хайҕаллаах дьыала.
«Ийэ олоҥхоһут Афанасий Егорович Соловьев Тумэл дьиэтэ» диэн ааттаах дьоҕус музей дьаҥ аастаҕына, ыарыы сүттэҕинэ ыалдьыттарга аанын арыйарга бэлэм турар. Тэрийээччилэр баҕа санаалара үүнэр көлүөнэ, оҕолор кэлэн көрөллөрүгэр, үөрэтэллэригэр, уһуйуллалларыгар диэн. Оннук буолуо даҕаны диэн бүк эрэллээхтэр. «Саха киһитэ бэйэтин олоңхотун көлүөнэттэн көлүөнэҕэ саамай күндү баай оңостон ильдэ сылдьарын тухары, саха норуота уһун үйэлэргэ тыыннаах буолуо» диэн улуу олоҥхоһут Афанасий Соловьев этэн, суруйан хаалларбыт тыллара улахан суолталаахтар. Биллиилээх олоҥхоһут баҕа санаата бу музей нөҥүө салгыы сахабыт культуратын сайыннара туруо.
Мария Ларионова.

Фотографии по теме
Комментарии 0
Добавлять комментарии могут только зарегистрированные пользователи.
[ Регистрация | Вход ]
Copyright © 2014 АУ Редакция газеты «Олекма» Хостинг от uCoz Design created by ATHEMES