Главная » 2021 » Февраль » 16 » Өлүөхүмэлэр сахалыы диктаны суруйдулар

Өлүөхүмэлэр сахалыы диктаны суруйдулар

2021-02-16 в 9:19 AM просмотров: 64 комментариев: 0 Новости Олекмы

Олунньу 13 күнүгэр Төрөөбүт тыл уонна сурук-бичик күнүн тэрээһиннэрин чэрчитинэн Өлүөхүмэ улууһугар 10 библиотекаҕа уонна үөрэх салааларыгар барыларыгар диктант суруйуута буолла. 
Биһиги республикабытыгар бу ахсыс сылын ыытыллар тэрээһин, оттон Өлүөхүмэ улууһугар үһүс сыла. Бүгүҥҥү диктаҥҥа библиотекаларга уопсайа сүүстэн тахса киһи кыттыыны ылла. Ол курдук Кээччигэ, Улахан-Муҥкуга, Бэс-Күөлгэ, Дабааҥҥа, Куду-Күөлгэ, Урицкайга, Хороҕо, Киин Абаҕаҕа, Тээнэҕэ уонна Өлүөхүмэ куоракка дьон көхтөөх кыттыыны ыллылар. 
Тээнэ нэһилиэгэр эбэҥкилии тылынан суруйуу буолла, уопсайа 23 кыттааччы холонно. Уонна аҕыларыгар сахалыы тылынан буолла. Бу тэрээһини сүрүннээн библиотека үлэһиттэрэ тэрийэн ыыттыллар, уонна биллэрин курдук, тыл учууталлара. Өлүөхүмэ куоратыгар 11 киһи кытынна, ол иһигэр икки оҕо. Манна бастакы нүөмэрдээх орто оскуола саха тылын учуутала Мария Валерьевна Николаева Амма Аччыгыйа «Атаҕастабыл» диэн кэпсээниттэн быһа тардыыттан диктаны олус тиийимтиэ гынан аахта. 
Суруйуу түмүгүнэн кыттааччылар бары туоһу сурук туттулар. Кыайыылаахтары бэлиэтээһин сиэрэ-туома кэлэр нэдиэлэҕэ буолара сабаҕаланар. Маннык тэрээһин киһи билиитин тургутарыгар уонна ордук төрөөбүт тылын өссө күүскэ ытыктыырыгар, сыаналыырыгар туһалаах. Аныгы дьон сахалыы кинигэни соччо аахпат, онон айымньылартан быһа тардыы кинилэргэ ааҕыыга интэриэһи үөскэтэрэ саарбаҕа суох. Онон төрөөбүт тылбыт баайын, сүмэтин илдьэ сылдьан салгыы сайдыахха уонна өрөгөйдүөххэ! 

Мария Ларионова.

Фотографии по теме
Комментарии 0
Добавлять комментарии могут только зарегистрированные пользователи.
[ Регистрация | Вход ]
Copyright © 2014 АУ Редакция газеты «Олекма» Хостинг от uCoz Design created by ATHEMES