Главная » 2020 » Декабрь » 8 » Олоҥхо Декадатын күрэхтэрин түмүгэ

Олоҥхо Декадатын күрэхтэрин түмүгэ

2020-12-08 в 9:17 AM просмотров: 146 комментариев: 0 Общество

Олоҥхо Декадатын чэрчитинэн улууска культура салалтатынан тэриллибит инстаграм ситимин нөӊүө күрэхтэр буолан ааспыт түмүктэрин билиһиннэрэбин. Дьүүллүүр сүбэҕэ культура салалтатын сүрүннүүр үлэһиттэрэ уонна республикатааҕы норуот айымньытын дьиэтин методиһа А.В.Васильева үлэлээтилэр. 
Ол курдук «Олоӊхо дьоруойдарын тойуга» диэн күрэххэ икки бастакы миэстэ буолла. Абаҕаттан Светлана Нартахова Борокуоппай Ядрихинскай Бэдьээлэ «Дьырыбына Дьырылыатта» диэн олоӊхотуттан быһа тардыыны олус бэркэ толорбут. Өлүөхүмэ куораттан Марианна Копылова П.А. Ойуунускай «Дьулуруйар Нюргун Боотур» олоӊхотуттан туойбута эмиэ ордук дьүүллүүр сүбэ болҕомтотун тарта. 
Иккис миэстэҕэ Улахан-Муӊкуттан биллиилээх алгысчыт Изабелла Габышева алгыс тойугунан кыттан тигистэ. Үһүс миэстэни элбэҕи эрэннэрэр эдэр толорооччу Кыыллаах кыыһа Надежда Акимова «Эркимэн Бэргэн» олоӊхоттон толорон ылла. 
Толорооччулар бары даҕаны куоластара кылыһахтааҕа, толорор ньымаларын таһыма үрдүгэ үөрдэр.
Хомуска сахалыы тардыы күрэҕэр 17 кыттааччыттан кыайыылаахтара субу курдук буолла. Улахан дьон истэригэр бастакы миэстэҕэ Өлүөхүмэ куорат олохтооҕо Марианна Копылова таҕыста, иккис миэстэни Улахан Муӊкуттан Акулина Шалагина ылла, үһүс миэстэҕэ Улахан-Муӊкуттан Виталий Сорошев тигистэ. Маны таһынан Дабаантан кыттыбыт Сафоновтар дьиэ кэргэттэрэ анал аатынан наҕараадаланнылар. 
Оҕолорго бастакы миэстэни Иккис Нөрүктээйи культуратын киинин «Күндүл» фольклор бөлөҕө ылыан ылла. Бөлөҕүнэн толоруу уустук жанр, оҕолор бэйэ бэйэлэрин бэрткэ истэн биир ситим буолан толордулар. Иккис миэстэҕэ Улахан Муӊкуттан Виолетта Канаева тигистэ. Үһүс миэстэни Улахан-Муӊкуттан Күннэй Лаврушкина ылла. 
Ити курдук дьон төһө да пандемия буоллар тэрээһиӊӊэ олус көхтөөхтүк кытыннылар. Эһиилги буолар Олоӊхо ыһыаҕар таһымнарын өссө чочуйан ситиһиилээхтик күрэхтэргэ кыттан Өлүөхүмэбитин ааттатыахтара турдаҕа. Кыттааччыларга культура салалтатын аатыттан махталбытын тиэрдэбит. Кыайыылаахтар бары димпломунан уонна анал бириистэринэн наҕараадаланаллар. 

Мария ЛАРИОНОВА.

Фотографии по теме
Комментарии 0
Добавлять комментарии могут только зарегистрированные пользователи.
[ Регистрация | Вход ]
Copyright © 2014 АУ Редакция газеты «Олекма» Хостинг от uCoz Design created by ATHEMES