Главная » 2021 » Январь » 15 » Ытык ыал

Ытык ыал

2021-01-15 в 9:05 AM просмотров: 120 комментариев: 0 Общество

Айылҕаттан айдарыылаах, талба талааннаах дьон төрүүр - ууhуур, уос номоҕо буолбут Кыыллаах арыытыгар күн сирин күлүмүн көрөн, сибэкки тэҥэ кыыс оҕо буолан кырдал устун сүүрэн–көтөн улаатан, үөрэнэн, үрдүк үөрэҕи ылар кынаттанар кэмигэр, биhиги тумус туттар Далбар Хотуммут Валентина Спиридоновна, оччолорго, Дьокуускайдааҕы Государственнай университет устудьуона олоҕун аргыhын Малгаров Садот Моисеевиhы көрсөр. 
Эдэр дьон харахтарынан хайҕаhан, сүрэхтэринэн сөбүлэhэн, тапталларын холбоон 1961 сыл тохсунньутугар ыал буолаллар. 
Бараммат баай тыллаах өбүгэ эппитинии «ДЬЫЛ – хонук». Ол тэҥэ, бу сыл тохсунньу 15 күнүгэр «Норуоттар доҕордоhууларын» уордьан кавалера, СӨ үөрэҕириитин туйгуна Валентина Спиридоновна уонна СӨ үөрэҕириитин туйгуна, «Учууталлар учууталлара» знак хаhаайына, краевед учуутал, нэhилиэкпитигэр кыраайы үөрэтэр музейы төрүттээбит Садот Моисеевич Малгаровтар бииргэ олорбуттара 60 сылын томточчу туоларын бэлиэтиир дьоро күннэрэ үүннэ. Күн бүгүн Малгаровтар нэhилиэкпитигэр биллэр – көстөр ытык ыал, 5 оҕону атахтарыгар туруорбут, 9 сиэни, 3 хос сиэни иитиhэр – такайсар сис ыал. 
Ытык кэм сааhырыытын билиммэккэ, нэhилиэк общественнай үлэтигэр кыттыhан, көмүс сүбэлэринэн көмөлөhөллөрүгэр, Садот Моисеевич нэhилиэк депутатынан үлэлии-хамсыы сылдьалларыгар махталбыт муҥура суох!
Орто Дойду саамай улахан дьолун – ЫАЛ буолуу сүрүн соругун эhиги эҥкилэ суох толорон кэллигит. Бэйэ бэйэҕитигэр, оҕолоргутугар, сиэннэргитигэр кэрэхсэбиллээх сыhыаҥҥыт – бу барыта 60 сыл анара өттүгэр холбообут тапталгытын бүөбэйдээн, харыстаан, күн бүгүнүгэр диэри өрө тутан, кэлбиккит туоhута. 
Төрөөбүт дойдуга бэриниилээх буолуу дьиэ кэргэҥҥэ иитиллэн тахсарын тыыннаах туоhута Эhиги буолаҕыт. Эhиги үлэлээбит сыралаах үлэҕит, олоххо муударай сыhыаҥҥыт биир дойдулаахтаргытыгар, үөрэппит оҕолоргутугар иллээх – эйэлээх буоларга, кэргэнниилэр сыhыаннарыгар, оҕону иитиигэ, төрөөбүт төрүт сиргэ бэриниилээх буоларга туохха да тэҥнэммэт үтүө холобур буолар.
Ытыктабыллаах Валентина Спиридоновна уонна Садот Моисеевич, эhигини уонна эhиги дьиэ кэргэҥҥитин бука барыгыларын, тус бэйэм уонна биир дойдулаахтаргыт ааттарыттан ЫАЛ буолан бииргэ олорбуккут 60 сылынан итиитик, истиҥник эҕэрдэлиибин!
Уруй, Айхал эhиэхэ, тумус туттар сис ыалга! 
Үрдүк таптал күүhүнэн ҮЙЭ сааhы ситиhиҥ!

Кыыллаах нэhилиэгин баhылыга Р.Е. Лавернова.

Фотографии по теме
Комментарии 0
Добавлять комментарии могут только зарегистрированные пользователи.
[ Регистрация | Вход ]
Copyright © 2014 АУ Редакция газеты «Олекма» Хостинг от uCoz Design created by ATHEMES